Сустракаем гасцей
Сённня, напярэдадні Раства Хрыстова, дзіцячы сад сустракаў ганаровых гасцей, творчую групу кіраўнікоў і намеснікаў кіраўнікоў устаноў дашкольнай адукацыі Мінскай вобласці.
Перадсвяточнае дзейства пачалося з прэзентацыі эфектыўнага вопыта ўзаемадзеяння ўстановы дашкольнай адукацыі і сям’і ў рамках бацькоўскага клуба.
Далей, майстар па саломапляценні Святлана Ярашэвіч зачаравала гасцей ненадакучлівым расповядам пра традыцыйныя спосабы пляцення і правяла майстар-клас па вырабу саламянага каляднага павука. Кожны з прысутных змог зрабіць традыцыйны ромб, а Святлана “злучыла” іх і атрымаўся прыгожы павук, які будзе красавацца ў музеі садка.
Пасля госці наведалі этнаграфічны музей “Спадчына”, дзе экскурсію для іх правяла гаспадыня музея Крыловіч Ларыса Антонаўна. На прыканцы яна пачаставала ўсіх смачнай куццёй з мёдам і сухафруктамі.
Завіталі госці і ў тэатральную студыю “Жаронцы”. Атрымалі праграмкі і ўваходныя білеты, акунуліся ў атмасферу тэатра, даведаліся аб розных яго відах.
Сапраўдным сюрпрызам для гасцей стала знаёмства з музыкам Максімам. Ён расказаў пра народныя музычныя духавыя інструменты, пачынаючы ад гліняных свісцёлак і заканчваючы дудой. Усе гэтыя інструменты ў руках майстра ажылі, зачаравалі сваім гучаннем. Максім прапанаваў паспрабаваць прысутным прыняць непасрэдны ўдзел у стварэнні музычнага аркестра, дзе ён быў дэрыжорам, а ўсе з задавальненнем ігралі знаёмыя мелодыі і не ўтрымаліся, пусціліся ў скокі.
Музычны кіраўнік Таццяна Станіславаўна Глебік навучыла танчыць “Кракавяк па –ракаўску”, “Млын”.
Далей гасцей чакаў незвычайны народны тэатр “Батлейка”, дзе яны самі былі акцёрамі: вадзілі батлеечныя лялькі: анёлаў, мудрацоў і пастушкоў, спявалі калядную песню “Неба і зямля”,. Усе адчулі сябе сапраўднымі батлейшчыкамі, што ўдаўніну ўслаўлялі нараджэнне Хрыстова.
Закончылася сустрэча частаваннем адной з посных страў – варэнікамі.
Усе атрымалі асалоду і прыемныя ўражанні.
